Un grupo de homes i mulhieres de la tertúlia de l abade besitou Sendin i passou acá l die de sesta-feira. Comírun de las nuossas alheiras, la puosta mirandesa, l pernil, l persunto i bebírun de l nuosso bino, Cumo un de ls membros de la tertúlia stá casado an Bila Chana i ten buonas relaçones cun Sendin, cumbinou traer la tertúlia i pediu para you l porparar un passeio para ber alguas cousas durante l die.
La chegada de ls turistas
Chegórun a la hora de l’almuorço i cumo habien cumbinado, yá que l tiu de Bila Chana conhece bien a Eisidro, comírun alhá la puosta i quedórun alhi a dromir. An beç de la cena quejírun ua merenda cun las bariadades de comer, mais tradicionales. La merenda fui apuis de habéren cumprido l porgrama que l porparemos.
A coméren la puosta
La besita a Sendin durou toda la tarde i nun houbo tiempo de ber la terça parte de l que habiemos porparado, para quien diç que an Sendin nun hai que ber, habie de ls tener acumpanhado. Quedórun ademirados i pedírun que déssemos a coincer melhor todo l que tenemos, puis nunca habien eimaginado que Sendin ye mesmo un sitio que bale la pena besitar.
La purmeira besita fui al Centro de Música Tradicional
Mário Correia a fazer ua palhestra subre las tradiçones
Quedórun ademirados cun l Centro de Música i alguns quedórun de tornar. A seguir a la besita de l Centro besitemos la eigreija onde le fui splicado l que alhá tenemos, zde las eimages de ls séclos XIV até las mais modernas. Habie un que sabie que esta eigreija de Sendin yá nun era la purmeira i que yá habie tenido mais que ua recunstruçon.
La besita a la parte bielha de Sendin
La besita al artesanato de la praça
La proba de licores
Demos un passeio por la parte bielha de Sendin i passemos por ls sítios onde se fázen las colchas i outras cousas de artesanato. Outro de ls homes de la tertúlia tamien coincie a Antonho Ferreira, que faç las cousas an madeira, mas yá nun houbo tiempo de ir a ber todo l material que ten, mas la besita quedou para outro die.
A béren las arribas i l riu Douro
L riu Douro
Tamien staba perbista ua besita i ua proba de binos a la Copratiba, mas tamien nun houbo tiempo. Tubiemos que ir ber las arribas i l riu, eilhes nin eimaginában que l riu era assi.
Esta besita fui ua spriencia mui amportante, para ber que se puoden ourganizar muitas cousas destas, mas traendo las pessonas yá cun todo porparado.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
