Onte i hoije andubimos a fazer ua recuolha de retratos de todas las castas que son coincidas, an Sendin. Inda nun las retratemos a todas, mas de las que you conheço, yá retratemos 27 i que ban a quedar cumo decumento para que cun l arranque de las binhas, nun se perda un de ls nuossos patrimónios.
L que me acumpanhou a tirar ls retratos
Ye un home que stá a fazer un studo de todas las castas de l Praino. Pouca giente las conhece bien i menos inda, sabe l nome deilhas. Muitos que se fázen antendidos, la maior parte de las bezes solo sáben cunfundir, mas l mais custoso ye sabéren onde achar las ubas ciertas.
L moscatel antigo branco
Deixo-bos solo trés retratos, para berdes i gustaba que aqueilhes que conhéçan alguas de las castas mais antigas, que le tíren l retrato ou que l mánden tirar. Se quejíren dar-lo para l poner ne l decumento serie amportante, se nó, que mos anfórmen para nós l tirar. L decumento bai a quedar na AZATS.
L bastardo ruço
Las castas a que yá tirei l retrato son las seguintes:
Tintas:
-Touriga nacional – touriga francesa – tinta Garcia – tinta gorda – tintina – tinta amarielha – mourisco ou olho de rei – tinta riscada – tinta Roriz – tinta barroca – bastardo miúdo – bastardo ruço – moscatel antigo – tinta miúda ou cornifesto – berdeilho ruço i ferral.
Brancas:
-Polheta ou carrega branco – malbasia rei ou caré – malbasia fina – berdelho branco – formosa – moscatel miúdo – Fernão pires – erbilho – terruntés – dona branca e síria.
L terruntés
Durante la semana outras habemos de ancuntrar. Nestas nun stan las de mesa, por esso nun débeis cunfundir las mostaqueleiras que you amentei, cun las que ténen l bago maior i que son mais uba de mesa. Ferral hai bárias culidades i estes nun son ls de latada. La dona maria tamien nun ye la uba de mesa. Todas sírben para comer, mas las de mesa ténen ls bagos maiores.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
