LA TAÇA
Mais ua nuoba amportante, l Grupo Çportibo de Sendin, apuis de ne l anho passado haber ido jogar a Francia, este anho faç l purmeiro torneio anternacional de futebol a que le chamórun TORNEIO ANTERNACIONAL DE LAS BINDIMIAS . Las eiquipas partecipantes fúrun la de Sendin, la de Carçon i la de Pinilla de Zamora.
La eiquipa de Zamora
La eiquipa de Carçon
L torneio fui cun jogos antre las trés eiquipas i por períodos de 45minutos cada jogo. L purmeiro fui antre las eiquipas de Carçon i Pinilla de Zamora, que acabou cun la bitória de 2-1 de l Carçon. L jogo fui eiquelibrado i fui até la eiquipa spanhola la purmeira a marcar.
La eiquipa de Sendin
A seguir jogórun la eiquipa de Sendin i la de Zamora, que terminou cun la bitória de la eiquipa de Sendin por 5-1. L Sendin que este anho ten la maiorie de jogadores de Sendin i alredores, tubo un fuorte apoio de las aldés bezinas i pul que se biu ten ua eiquipa melhor que la de l anho passado.
Un momento de l purmeiro jogo
L árbitro
L último jogo fui antre Sendin i Carçon i cumo Sendin habie ganho por 5-1 i l Carçon por 2-1, al Sendin bastaba ampatar para ganhar l torneio. L Sendin marcou purmeiro i a ganhar por 1-0, pensou mais an çfender l resultado que jogar para marcar mais golos i quando assi ye acaba-se por passar deficuldades i fui l que acunteciu, cun l Carçon a ampatar. Cun 1-1 l jogo animou, mas chegou-se al fin cun esse resultado. Sendin ganhou l torneio.
L persidente de l Sendin i l capitan a mostráren la taça
Ne l final houbo un cumbibio antre las trés eiquipas i ls árbitros, cun todos satisfeitos porque todo corriu bien.
Ye amportante dezir que l árbitro era ouficial i nun tubo porblemas ne ls três jogos.
Tenemos tamien que dezir que Sendin yá ten tamien árbitro ouficial l que ben mostrar que la nuossa tierra stá siempre an porgresso.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
