Fazírun hoije eisame para bumbeiros, un grupo de 17 moços i moças que durante l anho tubírun anstruçon para séren bumbeiros de 3ª. classe. L eisame ampeçou cun la formatura de todos ls que íban fazer eisame a que se seguiu un eisame scrito subre l material, las reglas de cunduta i la teorie de fuogo i pronto socorro.
La formatura
Apuis fúrun las probas práticas, cumo se cumportáren nas formaturas, fazendo todos ls eisercícios de marcha i inda outelizaçon de ls machados, nas cerimónias ouficiales. Estes eisercícios puoden parecer de pouca amportancia, mas son fundamentales, yá que son ls que melhor ls fázen daprender a trabalhar an grupo i a respeitar la boç de comando.
Machados an çcanso
Machados al ombro
Posiçon de sentido
Apresentaçon de machados
A seguir fúrun las manobras de outilizaçon de las mangueiras, nun ataque al fuogo i este ye outro de ls eisercícios tamien amportantes para quien começa, yá que daprende tamien a trabalhar an eiquipa i a saber outilizar las mangueiras, cun sigurança i de brebe.
Stender mangueiras
Ancaixar mangueiras
Posiçon de ataque al fuogo
An açon
Tamien nun faltában ls mais bielhos, que stában a ber i por fin fui la palhestra final i l batismo de auga. Ye ua praxe, an que todos ls nuobos bumbeiros, apuis de aprobados, son molhados cun uas mangueiradas de auga. De 22 fazírun eisame 17.
Ls que stában a ber
L grupo apuis de batizado
Houbo outros eisercicios a que you nun assisti i ne l fin un lanche para todos, que bien l merecírun. Pula purmeira beç fizo eisame un bumbeiro de ua aldé bezina – Palaçuolo i l persidente de l júri de l’eisame fui l comandante de ls bumbeiros de Mogadouro, que mostrou ser cumpetente i que soubo lidar bien cun todos.
Ne l sitio de ls retratos podeis ber mais.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
