La bendima siempre fui un tiempo de “cuorre cuorre” que quier dezir de muito que fazer i an pouco tiempo. Las ubas ténen que se apanhar i nun hai muito tiempo para l fazer. Cumo you antendo las pessonas. Zde ls mius 10 anhos que ando nesse “cuorre cuorre” i sei bien l que custa.
La caleija de Santo Cristo
Habie un dito d’atrás que dezie:
San Miguel de las ubas,
Tarde benes i pouco duras!...
Este dito puode tener bárias anterpretaçones, para uns benie tarde porque yá se l tenie acabado l pipo i para outros porque yá chegába l Outonho i las chubas. Era un porblema para las pessonas, la bendimia, mas las ubas solo por este tiempo stában maduras. Die de San Miguel ye die 29 de Setembre.
La caleija de Camino Prado
La segunda parte de l dito tamien ten bárias anterpretaçones. Para uns duraba pouco porque tenien poucas ubas i para outros tenien pouca jeira. Todos esses porblemas deixórun algo nas pessonas i inda hoije la bendima ls aflige. Hoije hai outro que ben acontra l que ye la realidade de l que se passa, nun hai giente para fazer la bendima.
La caleija de Barrialto
Quando pensei dar esta nuoba i cumo fago muitas bezes, lembrei-me de poner algo de la nuossa cultura i cumo you tamien conheço todos ls buracos, para ir a saber de bendimadeiras ten que se ir por l lugar i para passar de uas rues para las outras, hai las caleijas que acúrtian l camino. Nun quédan bien estes retratos?
La parte de trás de la rue de Santo Cristo
Todas estas caleijas merecíen un tratamento para las mantener l melhor possible tal qual la arquitetura deilhas, mas cun remodelaçones nas casas, cun apoio de las antidades ouficiales.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
