Todo mundo se queixa que nun hai giente i que nun hai ubas, mas todo l die ls tratores nun parórun i a la nuite la Copratiba recebie ubas cun fuorça. Mas agora todo trabalha bien i nun ye perciso star muito tiempo a la spera.
Estes íban a ber
Ls tratores éntran, fázen la pesaige i tíran l grado na balança de la antrada i apuis ban a çcargar las ubas. Ban para la segunda balança, que ye la que cuntrola todo i onde fázen nuoba pesaige que sírbe para dar l peso de las ubas, ou se líban brancas i tintas dá l peso de las brancas, que son las que çcárgan purmeiro i sirbe de peso bruto para las tintas.
A tirar l grado
La moça de la segunda balança
Quando líban brancas i tintas, apuis de la pesaige na balança de riba, ban a çcargar i tórnan a pesar para dar l peso final de las tintas. Todo roda bien i ls cumputadores fázen todo. Solo ye perciso que las moças de las balanças stéian listas i steian cun atento. Por l que l HOIJE biu, fúrun bien scolhidas.
A çcargar las tintas
Ua cousa amportante son las manobras de ls tratores i ten que haber buona cordenaçon antre l pessoal i ls tratoristas. La maiorie stá yá bien habituada a estas andanças, mas siempre aparece un destes nuobos, que a la moda de l que diç l “Pica Tumilho” gusta de dar spetáclo.
A arrumar l trator
A las bezes hai que dar un jeito
Fiç esta nuoba por dues rezones, ua para mostrar cumo ye la receçon de las ubas i cumo stá todo ourganizado, até ls trabalhadores stan todos bien arranjados i outra rezon fui porque l HOIJE tubo un retratista, Nuno Santiago, que fizo ua coleçon de retratos que solo eilhes son ua ambora. Mas ide al photoblog de l SAL que alhá teneis cousas pimponas.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
