Nun podie deixar de tornar a falar de las barandas por dues rezones. Purmeiro porque inda habie pul menos dues, que cuido que ye amportante poner eiqui l retrato deilhas i segundo, porque querie falar de ls materiales que éran usados para fazer las barandas Por ls retratos puode ber-se, mas ye siempre amportante falar desso.
La baranda de la casa de Arnesto
La data an que fui feita la casa
Esta baranda ten tamien la sue stória, pus an baixo deilha muitos se sentórun a dar meia dúzia de reitólicas i tamien era un sitio de cumbíbio. La casa serie ua de las mais antigas de l Canzielho i neilha tenerie morado un padre. L HOIJE bai a porcurar saber la stória dessa casa, para un die bos la screbir.
La baranda de la casa de l padre Alfredo
Esta baranda ye ua de las mais guapas, nun ten la data, mas era tamien ua casa amportante i neilha bibiu l padre Alfredo i l major Ferreira, que fui persidente de la Câmara de Miranda. Hoije la casa ye de la familhia deilhes i nun mos podemos squecer de la doutora Lurdinhas, que muito fizo para tenermos l Ciclo an Sendin.
La baranda de l Sagrado, la parte nuoba
Era buono tamien lembrar, l home de la doutora Lurdinhas, que fui quien tomou la RTP, ne l 25 de Abril i tamien l que ye hoije, l Gobernador Cebil de Bragancia, Jorge Gomes, genro de l major.
Cumo podeis ber por ls retratos, las barandas éran feitas de trés materiales i todas tenien la sue arte i beleza. Habie las de piedra, cun quelunas trabalhadas, las de fierro forjado, berdadeiras abras d’arte i las de madeira, que son tan guapas, que inda hoije ancántan la giente. Ls nuobos ténen muito que studar, se quejíren.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
