Comemora-se hoije l die mundial de ls animales , para muita giente ye ua nuoba sien muito anteresse, mas cada die que passa l mundo bai demudando i las pessonas cada beç mais, ban bendo las cousas de un modo defrente. Ls animales, yá son bistos cumo seres que hai que respeitar, nun mos debemos squecer, que nós tamien somos animales.
Nun ye lindo este retrato?
Ye cierto que nós somos animales racionales, mas todos tenemos que oucupar l lugar que mos pertenece ne l mundo. Quantas bezes, nun dezimos que l gato ou l perro que tenemos an casa, parece que antende todo cumo la giente?
Un perrico
Neste die stou a screbir subre ls animales para que cada beç mais, an todos ls dies de l anho, mos lembremos que respeitar i tratar bien ls animales ye un deber de todos nós. Eilhes son berdadeiros eisemplos de amor por ls filhos, de amisade i de respeito pul dunho, cousas de que muitas bezes mos squecemos.
Ls nius de las andorinas
Se mirarmos bien para las sues casas, ls nius, beremos la arte i l trabalho que eilhes amprégan i que muitos de nós nun respeitamos.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
