Comemora-se hoije l die mundial de l porsor i este anho la mensage sculhida fui –ls porsores cúntan- que quier dezir que para l feturo de un paiç, ls porsores son de las cousas mais amportantes i hai que cuntar siempre cun eilhes para que l zambolbimiento se faga de la melhor maneira.
Un cartaç de l die
Tamien fui porsor durante 30 anhos an Sendin i cumo todos ls porsores que eiqui dórun scuola algo cuntemos para l zambolbimiento de la nuossa bila. Cada un a la sue maneira, deixou un marco que para siempre quedará.
La sala onde hai mais de 20 anhos dei scuola
Fago esta nuoba para que pul menos un die ne l anho, las pessonas pénsen ne ls sous porsores i mesmo tenendo rezones de queixa de alguas cousas, bos lembreis de tanta cousa buona que ls buossos porsores bos ajudórun a scubrir.
Quando se dában galardones als buns alunos
Quando inda habie balancés na scuola
Todos teneis cuncencia que hoije ye defícele ser porsor i que l ansino passa por un momiento de mudanças, que ban a ser fundamentales para la nuossa sociadade. Por esso bos piedo que partecipeis i ajudeis ls porsores, para por todos se fazer ua melhor scuola. Ls que sodes pais i teneis filhos na scuola, ide alhá i fazei oubir la buossa boç. Partecipai nas reuniones i na ourganizaçon de la scuola.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
