Todos ls anhos se fázen por bárias rues de Sendin, yá se fizo pal pobo todo i habie mardomos i todo para la fazer. Nós inda la ourganizemos alguns anhos, mas cun la fiesta de la bila, que se faç a 13 de Júlio, la sardinada para todo l pobo perdiu anteresse i tornou a la tradiçon de se fazer ne ls bárrios.
La fogueira ye de la rue de l Matadouro
L’outro anho amostrei-bos la sardinada de las scalabadas, este anho ye la de l Canzielho i de las rues desse sitio. Esta fui la única que se fizo ne l die de San Juan a la nuite, mas outras stan marcadas para ls dies a seguir. Die 26 ye ne ls bumbeiros i ne l Sábado ye pal Baiunco.
Américo fui l assador de serbício
Ye siempre un cumbibio animado, de todos ls bezinos i onde l sendinés ye la léngua mais falada. Ye nestes cumbibios que se amostra l berdadeiro sentir de l nuosso pobo, feliç i ami(g)o, partelhando l de todos cun todos. Ye eiqui que se daprende a ser sendinés, zde pequeinho, porque eiqui solo hai un Dius que ye la nuossa tierra.
Las mesa stában chenas
Comiu-se, cantou-se, beilou-se i saltou-se la fogueira, pal anho bamos a traer la telbison i bamos a fazer un filme i a screbir un libro, si, porque yá bénen muitos turistas cumo l de ls retratos que ponemos a seguir, que zde l Canadá bieno a la sardinada i nun deixou de dançar tambien.
Aniceto staba animado i cuntento
Sendin ye mesmo ua tierra que ten todo i de todo, mas tenemos que mos ajuntar todos i eisigir l Anstituto de la Cultura i de la Léugua an sendin. Para ampeçar, bamos a eisigir que se torne publico i traspariente l que se anda a fazer.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
