Cumo bos habie dito, la tradiçon de fazer la fogueira de San Juan i la sardinada para ls bezinos, passou a fazer-se tamien nas Associaçones i ls Bumbeiros fazírun-la culs sócios que quejírun partecipar. Yá nun se cómen solo sardinas, porque hai quien nun guste i la fiesta ten que ser para todos.
Matilde i Orlando assórun las sardinas
L caldo berde ye outra de las cousas que nun falta nestes dies, mas yá faç tamien parte de l comer, la barri(g)a de cochino i la carne antremeada, que assadas nas brasas son ua marabilha i inda mais quando ls cochinos son de raça bísara ou criados an casa. Siempre hai quien liebe un garrafon de bino caseiro, mas la Compratiba nunca deixa que falte de bober.
Manuel Paxareiro assaba la chicha
Mas nun se come i bebe solo, tamien se cántan i béilan las músicas de San Juan i cumo yá hai giente fidalga, tamien yá se tócan las musicas de la moda i nuobos i bielhos amóstran las sues hablidades, agarrados ou zapartados. Ye assi que se bai cumbatindo la mala calantrç de la bida.
Giente nunca falta
I quien baile tamien nó
Que pal anho tornemos a cumbibir i amostrar que Sendin stá siempre arriba de ls anteresses de quien solo se lembra del quando percisa. Las eileiçones pássan debrebe i apuis bamos a ber quien ye sendinés.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
