Ls pouliteiros de Dues Eigreijas bejitórun ls Stadou Ounidos i mais ua beç seguindo la tradiçon de ls tiempos an que l Pe. Mourinho era l diretor de l grupo, atuórun an NJ – USA para la quemunidade pertuesa i dórun spetáclo por las rues para ls amaricanos tamien.
L grupo de Dues Eigreijas, e ls Stados ounidos
(retrato de Suzana Ruano)
Ne l seguimento de l que dezie onte, Sendin ten de todo i sta an todo l que diç respeito a las tradiçones i a la cultura mirandesas. Tamien agora, un de ls eilementos amportantes deste grupo era sendinés, nin mais nin menos que l gueiteiro. Henrique tamien amostrou sendin, tocando por las rues de NJ - USA.
L gueiteiro tocando por las rues
(retrato de Suzana Ruano)
Mas ls sendineses nun son solo para se amostráren, mas tamien para partecipáren i alhá stában ls que bíben an NJ - USA a recebir ls pouliteiros mirandeses i a cumbibíren cun eilhes i de tal modo, que merecírun ls agradecimentos de l grupo de Dues Eigreijas, cumo podeis ber ne l libro de bejitas.
Rogério cun eilhes
(retrato de Suzana Ruano)
I Henrique
(retrato de Suzana Ruano)
Durante todo l Berano ls grupos de pouliteiros, ban pul mundo afuora adonde líeban la nuossa léngua i las nuossas danças i tradiçones. I essa li(g)açon cun las quemunidades mirandesas i cun ls outros pobos de l mundo, que fázen grande l Praino i fui i ye esso que mantén la nuossa cultura hai cientos de anhos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
