L HOIJE , assi cumo todos ls meios de quemunicaçon, lougo que pássan a tener ua cierta notariedade, ampéçan a ser un strobilho para ciertas pessonas, mas dében tamien passar a tener outro cuidado cun l que scíben, porque ls sous leitores son pessonas cun muitos modos de pensar i çfrentes ne l modo de ber las cousas.
Caminando por la borda de l riu Douro
Nós tenemos siempre porcurado anformar la giente i arriba de todo amostrar la nuossa tierra i l que se bai passando, mas sien deixarmos de dar, donde an onde, la nuossa oupenion, inda que por bezes nun seia de la maneira mais cierta, mas l que mos faç andar ye poner las pessonas a lidar cun la nuossa léngua i fazer, cun que cada beç mais, ls leitores gústen de sendin i de l Praino.
Tamien hai un barco para las pessonas, nun hai solo an Miranda
Sendin nunca fui muito ua tierra caras al riu, porque houbo siempre ua cierta represson subre las pessonas para las apartar de l riu, mas hoije yá nun hai esso i pul cuntrairo, hai que fazer la giente mirar para ua de las sues maiores riquezas. La pesca i l turismo son caminos a fazer. L riu ye tamien Sendin, porque ne l nuosso termo ye solo pertués.
Ls caiaques i l remo son çportos a criar
Ye berdade que ciertas politicas i políticos, mos quíeren tener loinje de l riu por outras rezones, mas tenemos de agarrar l que ye nuosso cun las dues manos. Datrás acraditabamos ne ls ricos i dou l que dou, deixórun-mos a pedir. Agora nun bamos a caer nessa de acraditar ne ls anteletuales, que solo quieren sustituir ls ricos. Estes nun quíeren denheiro, mas criados de serbir.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
