Todos ls anhos se faç l cuncurso de pesca ne l riu i ban siempre muitos cuncorrentes, nuobos i bielhos, moços i moças. Son estas atibidades que fázen ganhar gusto por la pesca i que se trasmíten de pais para filhos, para que téngan sentido las açones para fazer de l turismo ua riqueza para todos.
Paulo porparaba-se pal cuncurso
Pitica porparaba l anzol
Domingos ansaiaba la canha
Lougo por la manhana se ajuntórun ne ls Pisones onde se desaiunórun i fazírun l sorteio de ls sítios adonde se habíen de poner por la borda de l riu alantre. L cuncurso ye ua cousa séria i que todos gústan de seguir cumo mándan las réglas. La Associaçon de Caça i Pesca ourganiza todo i siempre ten sido un cuncurso afamado.
Ampeçou l cuncurso i nun se oubie un pio, ls uolhos stában na auga
L sedal sticado cun l’anzol na punta, staba alhi para anganhar las carpas
Un bielho i un nuobo – Machado i l sobrino
Un moço i ua moça
La pesca fui buona i apanhórun-se buonos eisemplares, cumo l de l purmeiro retrato que bos amostro a seguir. Acabado l tiempo de pesca houbo que pesar ls peixes de cada cuncorrente para ber quien ganhou la taça. L die staba de marabilha i dou para ls acumpanhantes de ls pescadores passáren ua tarde de bacanças, que nada quedou a deber a un die de praia ne l Algarbe.
La carpa era grande
La antrega de las taças
L Presidente de la Junta i de la Associaçon de Caça i Pesca
L almuorço
L HOIJE para alhá de las amboras faç siempre ua ouserbaçon ou dá ua oupenion, que nin siempre agrada a alguns, mas tenemos la nuossa ourientaçon redatórial. Solo preguntamos, mas se l presidente de la Junta ye ua pessona séria, ten feito un bun trabalho cumo presidente de la Junta i de la Associaçon de Caça i Pesca, porque será que nun cuntina?
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
