Para alhá de las cerimónias oufeciales i de la einouguraçon de la casa de l pouliteiro, la fiesta tubo tamien outros momientos amportantes i houbo animaçon i cumbibio de l pobo. La fanfarra animou la giente que se ajuntou, purmeiro na eigreija, adonde houbo missa por todos ls sendineses que yá mos deixórun i a seguir junto de la casa de l pouliteiro para la einouguraçon.
La fanfarra anunciou la fiesta
La bandeira de la bila tamien staba na casa de l pouliteiro
Dançórun ls pouliteiros i einougurada la casa de l pouliteiro, houbo la cena-cumbibio ne l Sagrado, cun sardinas assadas, bitela i bino branco i tinto de la Compratiba. Tocou l cunjunto i atuórun bários grupos musicales sendineses.
Dançórun ls pouliteiros
Fúrun dados ls galardones de “sendinés de honra” que este anho fúrun atribuídos a tiu Manuel André, Pe. Manuel Afonso, Srº. Almeida i Alfonsus Roixo. Estes galardones son dados a pessonas que l presidente de la Junta scuolhe por las achar merecedoras de séren cunsideradas sendineses de honra.
La cena-cumbibio
Para ls que son squecidos quiero lembrar que l festibal ARTERCÉLTICO ampeça die 31 de Júlio, por esso ye buono irdes-bos porparando.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
