Las aldés de Fuonte Aldé i Sendin, ne l cunceilho de Miranda de l Douro, ban a fazer, de l 25 de Júlio al 2 de Agosto, la purmeira Feira de ls Strumientos Musicales Eibéricos. L'einiciatiba ben dun porjeto transfronteiriço, de la respunsabilidade de la Direçon Regional de la Cultura de l Norte i de la antidade respunsable pula Cultura i Turismo de la Junta de Castielha i Lion, chamado “Linha Mestre Norte/Línea Mestre Norte”.
La caminada de burros será assi
L porjeto fui apresentado sesta-feira, 10 de Júlio, an Miranda de l Douro, na data an que se comemoraba l die de la cidade, i ten un ourçamiento global superior a 500 mil euros, cumpartecipados an 75 por ciento pul Fondo de Zambolbimento Regional. Dinamizar la region de l Praino mirandés i de ls pobos de la probíncia de Çamora atrabeç de l recurso a las artes, an particular a la música i als strumientos musicales, ye un de l percipales oujetibos de l porjeto.
Alguns de ls strumientos para la sposiçon
Para alhá de la Feira de ls Strumientos Musicales Eibéricos, ls cunceilhos de Miranda de l Douro, Mogadouro i Bomioso, ban a promober un porgrama cultural qu'anclui un ancontro de danças tradicionales i un festibal de cinema. L porgrama antegra inda l yá tradicional Festibal Antercéltico de Sendin, que se realiza ne l seguimento de la Feira de Strumientos, i l Festibal de Música Tradicional L Burro I L Gueiteiro, qu'acuntece de l 25 al 29 de Júlio.
La gaita de tiu Pepe(un de ls maiores gueiteiros de l Praino)
L porjeto “Linha Mestre Norte/Línea Mestre Norte” fui un de l trés porjetos yá aprobados ne l ámbito de la Coperaçon Transfrunteiriça Spanha – Pertual .
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
