L die de San Martino, cumo ben sendo hábito tols anhos, ye comemorado pul Agrupamiento de Scuolas de Sendin cun bárias atebidades. Pula manhana fazírun-se las corridas, drento de las bárias eidades i por las rues an buolta de las scuolas. Ne l fin fui la antrega de las medalhas, que ye siempre un momiento alto de las atebidades.
Las corridas
La antrega de las medalhas
L almuorço fui na cerca de la scuola para alunos, ampregados, porsores i cumbidados. Ampeçou pul caldo berde i las sardinas assadas i apuis cuntinou cun la marrana i la chicha de bitela assadas nua fogueira, que las ampregadas i ampregados mantubírun acesa até al fin de l cumbibio. La fruta i las castanhas fúrun la subremesa.
Hai siempre ls que trabálhan i ls stan a mirar
Tamien dou para las ampregadas se debertíren
Estes fúrun ls que assórun las castanhas
Porsoras i ampregadas serbíen l caldo berde
Quando hai buona colaboraçon antre todos todo ye mais fácele i anton quando se trata de comer i buber inda mais, se nun bos acraditais mirai pals retratos que bénen a seguir.
Estes nun ténen fastio
Todo mundo cumbibiu i comiu
Las castanhas éran a manadas
I assi se passou mais un die i pal anho hai mais.
L HOIJE yá ye cumo l xaringador, torna tols anhos tamien.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
