LA CUNFRARIE DE LA GASTRONOMIE I DE LS BINOS DE TRAS-LS-MONTES I ALTO DOURO FIZO L SOU CAPITULO AN BREGÁNCIA
La CEGTAD cumo ye coincida fizo la sue reunion de l Outonho, an Bregáncia, ne l auditório Munecipal Paulo Quintela. Mas durante todo l die de hoije, ls cunfrades tubírun atibidades culturales. Lougo por la manhana seguírun acumpanhados puls gueiteiros de Sendin de la praça de la Sé até al “Centro de Arte Contemporânea Graça Morais”.
Ls gueiteiros de Sendin animórun la fiesta
Ne l Centro, bejitórun las sposiçones de Cutileiro i Graça Morais, guiados pula pintora i pul Diretor de l Centro, que fúrun amostrando ls zeinhos, las pinturas, ls retratos i las sculturas de las sposiçones, splicando todo para melhor se podéren apreciar.
Graça Morais a falar subre las pinturas
Apuis de la bejita a las sposiçones fúrun las cerimónias de la entronizaçon i cunfirmaçon de ls nuobos cunfrades. Este anho fúrun etronizados seis nuobos cunfrades i cunfirmados trés, antre eilhes l porsor Almendra.
La mesa de l Gran-Mestre
Ls nuobos cunfrades
A seguir fui l’almuorço, todo el de cousas regionales i nun faltórun ls roques, las castanhas, la caça i ls buonos binos de la region. Durante l almuorço houbo bários sfregantes de cultura que alguns cunfrades mos quejírun dar. Ls nuossos gueiteiros animórun la fiesta i l mirandés stubo presente nun brinde als nuobos cunfrades feito por Amadeu Ferreira.
Nesta mesa hai sendineses
La cunfrarie yá ten alguns sendineses cumo cunfrades. Fazimos alguns bideos i yá bos amostraremos manhana ou passado ls que quedórun melhor.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
