Dous moços morrírun na madrugada d'onte, nun acidente junto a la localidade de Fuonte Aldé, an Miranda de l Douro. Çpistórun-se nua zona de rebuoltas adonde ne ls redadeiros anhos yá fúrun registradas trés muortes. L carro ambatiu nua arble.
Cumo quedou l carro
Dous bumbeiros ancontrórun l carro çpistado, cerca de las 03.00, i alertórun la corporaçon de Sendin. "Fumos abisados por dous bumbeiros que se dirigien para Miranda i bírun l carro inda culas luzes acesas. Ua de las bítimas tenie ua mano i ua çapatilha de fura", cuntou l comandante de la corporaçon.
Pal local seguírun dues ambuláncias de Sendin, outra de suporte básico de bida de Miranda de l Douro i la biatura médica d'eimergéncia i reanimaçon de Bergáncia.
Las biaturas de socorro ne l local
"L carro staba abraçado a un frezno i tubimos de usar material de zancarceramiento para retirar las dues bítimas", diç José Campos. Las eiquipas de socorro tentórun, mas yá nun cunseguírun reanimar nanhun de ls dous moços, de 19 i 21 anhos. Ls moços éran de Mogadouro.
L'acidente acunteciu a la salida de Fuonte d'Aldé, ne l sentido Miranda-Mogadouro, nua zona de rebuoltas que ténen sido mortales. "Fui na EN221 a la salida de l'aldé, nua rebuolta fatídica adonde yá acunteciu un acidente mortal hai seis ó siete anhos. Cien metros antes houbo outro acidente mortal i outro mais atrás inda", diç l comandante.
Sandra Bento (Diário de noticias)
