Cumo bos habie prometido ende teneis un bideo de l brinde an mirandés feito por l nuosso grande sendinés Amadeu Ferreira. I quien melhor que el para l fazer? L mirandés ten que star adonde stubirmos nós, fui nessa léngua que daprendimos a falar i oubir falar, inda na barri(g)a de nuossas mais i esso cunta.
Puode parecer a alguns que esto ye ua cousa sien amportáncia, mas tubíssemos outros registros cumo este de hai muitos anhos i la nuossa léngua starie mais rica. Son pequeinhas cousas, mas la bida ye feita de pequeinhos cachicos que ajuntando-se fázen cousas grandes. I nien siempre las cousas grandes son las mais amportantes, pequeinho ye l birus de la gripe A i trai todo mundo an bolandinas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
