L Menistro de la Admenistraçon Anterna aponiu-se a fazer reuniones de trabalho, de l sou menistério puls çtritos de Pertual. Calhou-le la beç al çtrito de Bergáncia i cumo la reunion ye culs Secretairos de Stado i ls Gobernadores Cebiles, son estes, an cada çtrito, a tratar de todo. Cumo l Gobernador Cebil de Bergáncia, Jorge Gomes ye casado an Sendin i l menistro naciu an Dues Eigreijas, la reunion fui marcada para Miranda i bai a ser neste fin de semana. Speramos que nesta reunion séien assinados ls protocolos de las nuobas eiquipas de bumbeiros, para Sendin i Miranda, quedaremos cuntentos porque Sendin poderie haber sido la purmeira, cumo querie Jorge Gomes, inda bien que acaba por tornar al Goberno Cebil para la ber criada.
Mais un bideo de amboras de la region que eiqui queda para ls que nun púoden ber las amboras a la hora an que sálen, mas que eiqui las ténen siempre que quejíren saber deilhas. - Por saber nuobas nun bos mateis, bielhas ou nuobas bós las sabereis -.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
