La autobia de l Duero que bai de Soria a la raia cun Pertual, tamien chamada A-11 yá anhos que stá a fazer-se, i passa por Aranda, Valladolid, Tordesillas, Zamora i bai a San Martin de Pedroso, adonde entra an Pertual pur la raia de Quintanilha. La autobia de Zamora a Quintanilha fui agora ampreitada. Las obras yá ampeçórun acerca de Zamora, mas solo an 2011 beremos las obras até la raia.
De l lhado spanhol bai a haber dues salidas para l nuosso cunceilho, ua que poderá seguir até Infaiç i outra a la Luç. L IC5 parece ir de Dues Eigreijas a la Luç , mas para l Praino las dues son amportantes, ua ye melhor para ir a Bergáncia i la outra para ir a Zamora. Tamien bos queremos dar la ambora de que l TGV (Spanhol) bai a chegar a Zamora en 2012, que cun la autobia a passar mesmo acerquita de l cunceilho, bamos a quedar melhor li(g)ados a la Ouropa que Lisboua ou l Porto. Tamien nun ye admirança nanhue, porque tamien stamos mais acerca que eilhes de la Ouropa.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
