Mais un die de cumbibio de ls caçadores de Atanor i de las aldés al sou alredror, mais ua montarie al cochino brabo. I cumo podereis ber ne l bideo, yá hai mais un “javali” para la próssima fiesta de la Associaçon. Screbi “javali” porque an Atanor se fala mais l pertués i sei que muita giente de Atanor ben al HOIJE a saber de amboras de la sue tierra i alguas pessonas telifonórun a saber de cumo habie corrido la montarie al “javali”.
Desta beç l’almuorço fui rancho a la Trásmuntana i cumo podeis ber pul bideo, parece tener buona cara, mas nós podemos dezir-bos que staba mesmo buono. Mas l que fui mais amportante fui la colaboraçon de las dues Associaçones de Atanor. La de la caça, de que somos presidentes de la Assamblé Giral i que fizo la montarie i la Associaçon Cultural , de que somos Secretário de la direçon i que fizo l quemer. Tanto nua Associaçon cumo na outra son ls eilementos de las direçones que trabálhan, sien ganhar nada, mesmo para fazéren l quemer, ponéren las mesas i serbíren. Mas ls associados tamien fázen todo pulas sues associaçones, por esso se bei la alegrie de l cumbibio.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
