Las cidades de Bragança, Chaves, Macedo de Cavaleiros, Miranda do Douro, Mirandela i Valpaços ajuntórun-se nun mobimiento eicológico para aporbeitáren un anstrumiento de la UE i criáren ua rede de cidades eicológicas i einobadoras de Trás-ls-montes. Estas cidades quíeren tener un modelo de zambuolbimiento que pertenéça a todas i que siga l cunceito ”eco” para çfensia de l ambiente an todo l zambuolbimiento antegrado, mas percipalmente nas atibidades ligadas a la agro-andústria, al turismo i a la costruçon. Este mobimiento ye ounico ne l Paiç.
Miranda
Para alhá de tornar mais fuortes ls recursos de cada cidade, este mobimiento quier aporbeitar todo l que seia útele para ls 148 000 moradores de ls sous termos i stán yá an andamiento cinco porjetos ne l balor de 15 000 000 de euros, un por cada cidade i nós iremos star cun todo l atento para bos dar mais amboras desto.
Chaves
L HOIJE ten tamien cumo oujetibo dibulgar la nuossa lhéngua i cumo inda hai pouco tiempo de prática de la scrita, hai palabras que se púoden screbir de maneiras çfrentes i a las bezes nós screbimos las dues, l que faç cun que ls mais atentos mos pregúnten qual la rezon.
Eisemplo: defrente/çfrente
La lhéngua scrita bino apuis de la lhéngua falada, cumo nuas aldés se diç çfrente i noutras defrente, las dues son outelizadas.
Tamien mos ténen preguntado porque screbimos ls nomes uas bezes an mirandés i outras an pertués. An mirandés, quando dezimos un nome de modo giral ou quando ye l nome de un mirandés, mas se fur un nome andebidualizado, ten que se screbir tal cumo ye. Nun seguimos muito esta regla, mas bamos a tener cuidado por la seguir.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
