REGAHO (Merujas)
Fumos a regaho, para salada i inda que seia anho del; i sabendo bien adonde l percurar, si, porque hai sítios adonde l hai siempre, mesmo an anhos de pouca chuba, bonda que la auga cuorra; nun achemos muito, staba todo bien rafado, outros cumo nós yá l'habíen apanhado. Mas nunca hai tiempo perdido, porque na bida hai muita cousa amportante, se ye que alguien sabe dezir l que ye mais amportante. L marulhar de la auga fizo-mos ber que l rieirico tenie algo tamien amportante para mos dar, la sue beleza i l sou sonido, era mesmo un riu an miniatura.
L bideo cuido que bos dará ua eideia de l que ye sabermos mirar para todas las cousas, cumo sendo las mais amportantes. Solo tenemos ua bida, hai que la bibir i tenemos que la bibir ne ls sítios por adonde andamos, chenos de tanta cousa buona i tan guapa, porquei nun le dar todo l'atento que podemos i debemos? Naide puode ser grande cumo l mar, nin tan reluziente cumo l Sol, mas puode ser guapo cumo ua flor inda que seia solo para quedar nun altar por un sfregante, ou para tornar feliç l que la dá i l que la recibe.
(Salada de regaho(merujas) ye ua de las mais gustosas de l Praino)
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
