Yá eiqui habimos falado de las candidaturas a las siete marabilhas naturales de Pertual i de las que fúrun apresentadas por las câmaras de Freixo, Vinhais i Macedo nun passórun a la fase seguinte. Die 26 de Janeiro habimos falado deilhas i habimos stranhado que de l Praino nun houbisse nanhue. Mas inda tenemos ua spráncia de l nuosso termo fazer parte de las siete marabilhas. L Parque de l Douro Anternacional fui candidatado cumo un cunjunto, por todos ls cunceilhos que fázen parte del, inda que haba quien, por anteresses pessonales, querga acabar cun el. L Parque stá na segunda fase de l cuncurso.
L bideo d’hoije fala desso i tamien de l IC5 porque hai dues aldés de l cunceilho de Mogadouro, que quíeren que la passaige, de un lado para outro de l IC5, se faga de maneira a podéren tener melhor acessiblidade a las sues tierras. Outra de las amboras ye la de que ban a ser feitos para ls cunceilhos de l Praino i Bergançia, an Bomioso, un canil i un gatil, para ls perros i gatos que ánden perdidos i tamien para guardar perros i gatos de quien ten que ls deixar durante ua eimergéncia ou quando ls duonhos ban de bacanças.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
