Nun ye por sermos presidente de la Copratiba que damos esta ambora, mas poque l HOIJE debe amostrar l que hai de buono i malo ne l Praino. La Copratiba de Sendin; que staba nua situaçon defícele, mesmo cun todos ls porblemas por que passa la biticultura i inda cun la crise que faç a todos passar dies de angústia, cun miedo de perder l amprego ou de ber las nuossas tierras quedar cada beç cun menos giente; cunseguiu mantener ls ampregos todos i aumentar até l númaro de trabalhadores durante l anho.
Contra todo l que alguns quíren fazer crer, la Copratiba yá bende quaije toda la sue porduçon an bino angarrafado, fazendo cun que la mais balie de l bino quede tamien an sendin. Nun se puode dezir que ye por pagar mal ou pagar pouco porque, mesmo tenendo eiqui ua de las melhores i maiores ampresas de binos de Pertual, paga melhor. Todo esto se debe a ua direçon ounida i capaç, onde cada un sabe acupar l sou lhugar i al trabalho de ls sous trabalhadores, que dán l sou melhor todos ls dies.
Ls respunsábles puls bários setores de la Copratiba i ye de referir, l drº. Paulo na geston i la angª. Ana na porduçon, ténen sido l coraçon de la Copratiba. La direçon soubo recoincer l sfuorço de ls trabalhadores i aumentou ls salários, mais que l acordo para l aumento de ls cuntratos coletibos de l setor. Tamien stan a lebar l nome de Sendin por todos ls cuntinentes i ls nuossos binos anfeitan alguns carros que ándan por ende, cumo podeis ber puls retratos. Ye ua oubrigaçon de todos ls sendineses apoiar la Copratiba , nun bos l dezimos por sermos de la direçon, mas cumo sendineses.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
