Nun ye fácele mantener un sitio destes todos ls dies i se l fago, nun ye solo por mi, mas eissencialmente pulas gientes de l Praino i pula lhéngua mirandesa. You tengo l cunsolo de fazer algo de buono, mas al mantener este sitio todos ls dies, ye porque muita giente quier saber nuobas de la sue tierra i al screbir an mirandés, la nuossa lhéngua stá tamien todos ls dies a antrar an centenas de casas.
Quando bou a poner ua ambora i beio las pessonas que durante l die stubírun a ler l HOIJE , mais fuorça ganho para cuntinar. Nun sei quien ben, mas l cuntador marca l númaro i se alguns márcan mais que ua beç, ye porque nun tubírun tiempo de ber ne ls outros dies, mas quando ténen oucasion béien todo. Hoije yá bai an mais de 800 bejitas, poderie parar?
Poderiemos fazer un HOIJE semanal ou mensal, cun bárias amboras, mas nun era eigual, por esso l fazemos tols dies, inda que, a las bezes, cun algun atraso, por esso ponemos amboras de dies atrasados, mas “ Por saber nuobas nun bos mateis, bielhas ou nuobas bós las sabereis” (dezie Bucaige). La de hoije ye subre las montaries antegradas na Feira de Sabores de l cunceilho.
Fúrun dues montaries, ua an San Pedro i outra an Bila Chana i quedórun na lhembráncia de todos i para l anho que ben, muita mais giente benirá al Praino, ye esso que amporta. Stá de parabienes la cámara, que al einobar acertou. Fúrun 32 cochinos brabos(???) que se caçórun ( l numaro nun ye fácele de dar porque al outro die de la montarie inda se achórun mais un ou dous). Ls retratos dízen todo.
( Ls retratos son de la Cámara – dreitos reserbados )
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
