Nada stá defenido quanto a la localizaçon de l matadouro de l Praino, mas son amportantes las eideias de todos para que quede ne l melhor sitio i que sirba melhor a todos. Nós yá hai muito que defendemos un de dous sítios i dambos a dous quédan antre ls cunceilhos de Miranda i Mogadouro. Un na zona andustrial de Sendin, na tierra de la junta i outro na staçon de Ruolos, na tierra de la Copratiba.
La tierra de la Junta
Quier nun sitio quier noutro tenerá buonos acessos de todos ls pobos, mesmo por las stradas secundárias i buono acesso por las dues salidas de l IC5. La de sendin ten la bantaige de tener la luç i l’auga acerca i de poder outelizar la ETAR de Sendin. I serie l modo de melhorar la ETAR de modo a funcionar melhor.
La tierra de la Copratiba
Este ye un de ls porblemas an que las pessonas i prencipalmente ls agricultores, dében partecipar para ls resolber i nun deixar que dous ou três fágan l que l dier na gana. Este ye un porblema de l Praino i nó de partidos ou de ua câmara solo. Sendin ten tamien la maior associaçon de agricultores de l Praino, que ye la Copratiba cun mais de 2300 sócios. Nun ye ua associaçon de dous ou três ami(g)os i que solo eisísten porque hai quien quier ser presidente de qualquiera cousa ou porque ten que serbir anteresses particulares ou partidarios.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
