Yá stan na staçon de Ruolos las obras de l IC5 cumo podeis ber puls retratos. Fumos de ls purmeiros a dar la ambora de que l IC5 habie ampeçado i tenemos acumpanhado ls trabalhos que se ban fazendo a bun ritmo i drento de dies yá beremos ls trabalhos ne l termo de Sendin.
Agora ye amportante saber adonde i cumo ban a ser feitos ls acessos, quier na staçon de Ruolos, quier na staçon de Sendin. Ye tamien amportqnte acumpanhar ls trabalhos para que ls acessos a las tierras de ls dous lados de l IC5 stéian d’acordo cun ls anteresses de todos i que las antradas nun séien peligrosas cumo acuntece nalguns sítios de l IP4.
L IC5 debrebe stará pronto até Dues Eigreijas, mas hai que pensar na sue ligaçon a Spanha, porque se nó bai a suceder cumo la linha de l camboio que alhi parou i fui ua de las rezones de esta haber acabado i de tenermos quedado dezenas de anhos eisolados. Yá bai sendo tiempo de sermos tratados cumo debe ser.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
