Die 20, die Anternecional de la Lhéngua Materna, realizou-se na Casa de la Cultura, en Miranda de l Douro, ua tarde de cumbersas en mirandés. Estas cumbersas ampeçórun a partir de las cinco de la tarde adonde ls partecipantes, para alhá de faláren de ls bários porblemas de la lhéngua mirandesa, las çficuldades i bantaiges de la segunda lhéngua oufecial de Pertual, tomórun un chá acumpanhado por la doçarie regional.
Esta fui ua einiciatiba de la Cámara Munecipal cun la antencion de balorar la lhéngua, la doçarie i la cultura mirandesas.
L HOIJE tamien stubo presente i son dessa tertúlia ls retratos que bos amostramos, todos ls partecipantes apresentórun las sues eideias subre l que pensában de la lhéngua i subre l que era amportante fazer. Tomemos cunta de la maiorie de l que se falou i cun mais cuidado fazeremos ua reseinha de todo, amporta agora dezir que algo quedou de amportante para tratar yá:
- La cámara fazerá todo para que l mirandés ste an todos ls abisos i cartazes de la Cámara , assi cumo an todas las anformaçones a la giente de l cunceilho.
- Será feita ua dinamizaçon para que ls comerciantes ampécen a poner abisos ne ls comércios, an mirandés i que se fala mirandés.
- Dar un prémio als ninos que mais se çtíngan ne l studo de l mirandés.
- Fazer cursos de mirandés atrabeç de l CNO.
- Poner un andicatibo an todas las antradas de l cunceilho de que eiqui se fala mirandés.
- Fazer un curso de mirandés ne l Berano adonde irán partecipar l Presidente i la Bereadora de la cultura.
- Cuntinar cun las tertúlias subre la lhéngua i la cultura mirandesas, tenendo sido marcada la próssima para la 5ª. Feira antes de la Páscoa.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
