Na sesta, an Atanor, houbo ua nuite de música i danças tradicionales, nua açon de colaboraçon antre la Associaçon Lérias de Palaçuolo i la de Atanor.
Fui ua nuite animada cun giente de las bárias aldés alredor de Atanor i que durou até a las 2h de la manhana.
Onte i hoije, an Atanor, houbo la 1ª. Workshop de Antruduçon a la Medicina Beterinaria ourganizada pula AEPGA.
Nesta 1ª eidiçon de l'anho de 2010, tratórun, percipalmente, ls aspetos relacionados cul arranjo corretibo de cascos, patologies associadas als cascos i a la locomoçon (diagnóstico de claudicaçones ó lamenites cumo eisemplo), patologies associadas al apareilho reprodutor, aspetos de l trabalho de campo propiamente dezido i nocones gerales i specíficas de l Praino de Melhoramiento Genético pa la Raça Asinina de Miranda i pa la Raça Zamorana-Leonesa .
Para alhá de l'aquesiçon de coincimientos an nuobas árias, ls partecipantes de ls workshops tubíran l'ouportunidade de coincer d'acerca la rialidade de l Nordeste Strasmuntano, çconhecido para muitos i cumbibírun d'acerca i dua maneira atiba culas populaçones locales.
Onte, na Copratiba de Sendin, houbo ua proba de binos.
Drento de l porgrama de las jornadas gastronómicas i einológicas de que bos habimos dado ambora ne l die 24 de Janeiro eiqui ne l HOIJE, stubírun na Copratiba un grupo de spanholes de Madrid que para alhá de bejitáren la Copratiba i tenéren probado ls binos, de que gustárun muito, cumprórun alguas caixas i dezírun que iban a benir mais bezes i a acunselhar ls ami(g)os beníren tamien.
Hoije l G.D.Sendim fui a jogar a Alfandega. ALFANDEGA – 2 SENDIM - 1
Mais ua jornada de l campeonato de futebol de la A.F .Bragança i l Sendin perdiu por 2-1. Fui un jogo animado i l Sendin solo perdiu porque la suorte nada quijo cun nós, yá que l Alfandega marcou ls golos quando nun merecie i yá ne l fin de l jogo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
