Este nun ye solo un sitio adonde se pónen las amboras de las atibidades que se fázen tols dies, mas tambien l que se diç i l que se fala, la stória i la cultura de l Praino. Cumo todos ls sítios adonde se scribe, tamien este ten ua ourientaçon pessonal, que quier ser l mais hounesta i eisenta possible, mas nin siempre agradamos a todos, queremos antretando dezir-bos que todo l que screbimos ou creticamos ten solo cumo fin, serbir l Praino i la sue giente.
Para serbir l Praino ye tols dies partecipar an atibidades i dar a coincer la nuossa tierra, nun ye andar a la selombra de ls partidos a stragar la bida de alguns ou a promober la de ls ami(g)os. Onte stubimos na Copratiba a recebir mais un grupo de spanholes que mos bejitórun, an mais ua açon de las jornadas gastronómicas i einológicas .
Mas lhougo pur la manhana acumpanhemos tamien mais ua atibidade an Atanor i que fizo cun que las Associaçones locales colaborássen i l turismo, la caça i la gastronomie stubírun de manos dadas. Solo para bos fazer crecer auga na boca, l almuorço fui guisado de cochino brabo i arroç de faison.
L’amportante i l que amporta mais, nun ye ua fiesta d’anho a anho, para ls anteletuales de la cidade podéren benir a amostrar-se ou a eisibir l sou poder i l de ls ami(g)os, mas mantener atibidades que fágan mantener la gana de bibir eiqui i críen puostos de trabalho i riqueza.
L jogo de l G.D.Sendin fui adiado por bias de la chuba.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
