QUE YE “TURISMO”?
Para ls ricos turismo ye ir a la Turquia , al Eigito, a la niebe, al Algarbe i tamien a ber ls burros mirandeses, ls alcaforros de Parque de l Douro Anternacional, ir a ber las almendreiras an frol, sei alhá que mais. Mas la maiorie de la giente tamien faç turismo i tamien gusta desso todo, mas l que cria mais riqueza ye l que las pessonas fázen tols dies i que todos púoden fazer quando quejíren. Ye esto que faç andar un paiç. Todo l que faç mobimentar i animar las pessonas ye l mais amportante.
Este bideo amostra bien l que ye amportante para la maiorie de la giente. Son las sues atibidades, ls sous amores, las sues alegries, las fiestas, ls çportos, la bida de l die a die. Un jogo Sendin – Miranda ye un die defrente, un die que faç mobimentar las pessonas, que anima, que ajunta, que debide, mas que al fin ye algo que gerou fuorça i einergie para seguir caminando cun mais gusto caras al feturo. Todo l que la câmara dá ye de todos i neste causo para todos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
