La salude de ls mais nuobos ye ua preocupaçon pa l munecípio de Miranda de l Douro. Por esso, la cámara munecipal ampeçou yá cula çtribuiçon de fruita i pordutos hortícolas als ninos que frequentan l 1º ciclo ne l cunceilho.
Esta medida solo fui possible porque l'outarquia biu aprobada la candidatura de l Regime Fruita Scolar formulada pul Anstituto de Financiamiento de la Agricultura i Pescas.
De referir, que cerca de 200 ninos stan a beneficiar desta eniciatiba. La fruita ye çtribuída de forma gratuita dues bezes por sumana até al final de l'anho letibo
Segundo l persidente de la Cámara de Miranda de l Douro, Artur Nunes "preténden-se promober hábitos de cunsumo d'alimentos buonos pa la salude de las populaçones mais moças".
Ne ls die 28, 29 i 30 de Maio la cidade de Miranda de l Douro bai regressar al passado i recordar l tiempo adonde las beladas i folias, mercadores i mesteirales, comeres i buberes, cabalheiros i peones, mouros, plebeus, damas i donzelas fazíen parte de la stória.
Esta ye ua atebidade adonde to la populaçon de l cunceilho stá ambuolbida. Zde la cunfeçon de ls trajes a la decoraçon mediebal de la cidade.
Recordamos que las anscriçones para spositores stan abiertas até al die 30 de Márcio.
Cul antuito de mantener ls moços de l cunceilho de Miranda de l Douro acupados durante las bacanças de la Páscoa l'outarquia lieba a cabo “ls ateliers de Páscoa”.
Esta eniciatiba pretende tamien ajudar ls pais an relaçon als tiempos libres de ls mais nuobos nesta época festiba.
Estes ateliers cunsísten an jogos de quemunicaçon i spresson, atebidades al aire libre, música, dança, spresson plástica, musical, atebidades de culinária i çportibas.
Para para alhá, de sensibelizar ls ninos pa l'amportança çportiba i animaçon cumo fator de socializaçon pretende-se inda criar i fortalecer hábitos d'acupaçon de l tiempo libre de forma positiba. De referir inda, qu'estas atebidades se rialízan de 29 de Márcio a 9 de Abril.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
