Onte stubimos an Bergáncia i cumo na scuola Paulo Quintela hai porsores i alunos filhos de sendineses, fumos a la feira solidária que fazírun para ajudar ls ninos de l Gana. Nada melhor que ua atibidade destas para festejar la Páscoa. La Páscoa debe ser un die de reconciliaçon cun nós i cun ls outros i mais amportante que fiestas para amostrar que ye Páscoa, son ls atos que trasmíten amizade i amor.
La Localvisão staba a filmar la feira i las atibidades i cumo ten mais meios que nós, yá nun fazimos l bideo i aprobeitemos l que eilhes fazírun para bos amostrar l que fui la feira. L mais amportante fui ber l’apoio de ls pais i cumo todos partecipórun. Tudo esto ye possible porque son las anstituiçones a fazer las cousas sien que ls políticos las outelízen. Las Câmaras i las Juntas dében serbir, nestes causos, para ajudar i nó para mandar.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
