Mais un anho i mais ua atibidade de la Páscoa , por tierras de l Rei , uas férias de Páscoa cun animaçon por ls caminos de ls alredrores de Sendin i tamien nas aldés de Atanor, Algoso, Valcerto, Prado Gaton i Sendin, nua ourganizaçon de la AEPGA.
Ls Gueiteiros acumpanharán ls camineiros pulas beredas de uas aldés a las outras. Las caminadas ampeçórun an Sendin i muitos turistas, cun las sues familhias cumpletas, alhá seguírun acabalho ne ls burros ou a pie, mesmo culs ninos pequeinhos, respirando aire puro i cuntatando cun la natureza.
Ls comeres fúrun ne l campo i fúrun acumpanhados por bárias atibidades de animaçon de que fazírun parte, la musica, la dança i las cuntas i representaçones de la bida campesina. Ye siempre ua fiesta para ls que mos bejítan, mas tamien para las gientes que ls béien porque ye un modo de recordar tiempos idos i de cuntatar nuobas pessonas.
A la nuite hai siempre arraiales nas aldés adonde acában las caminadas i este anho, l cunjunto “ Karrossel ” fui l percipal animador. Mas ls gueiteiros de la region i mesmo muitos de ls turistas, que tamien teníen algue arte, animórun las férias.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
