L die d’onte mais parecie un cunseilho de menistros, yá que las associaçones de Sendin i la Junta reunírun para tratar de las cousas de l pobo i alredores. Purmeiro fui la Copratiba que fizo la sue assamblé giral para aprobaçon de las cuntas i anformaçon de ls sous associados. Fui ua assamblé mui partecipada adonde stubírun quaije 100 associados, númaro mui amportante i que amostra que ls associados stan mais partecipatibos. Todo corriu bien i las cuntas fúrun aprobadas por ounanimidade.
A seguir fui la assamblé de la associaçon de ls Bumbeiros para aprobaçon de las cuntas i eileiçon de ls nuobos diretores. Las cuntas fúrun tamien aprobadas por ounanimidade i la única lista que se apresentou, tubo 58 botos sim i dous brancos. Cumo la assamblé se fizo ne l seguimento de la assamblé de la Copratiba , cumo ye uso tols anhos i porque ye tiempo de Páscoa, ls Bumbeiros dórun la bolha doce i l folar i la Copratiba dou l bino.
Para terminar l die houbo la Assamblé de Freguesie i tamien eiqui fúrun aprobadas las cuntas por ounanimidade, apuis de ua çcusson de las mesmas, que corriu cun todo l respeito i cibismo. Antes de la orde de l die i apuis de la aprobaçon de las cuntas, tamien houbo oucasion para la çcusson politica. Tamien assistiu bastante giente i cuidamos que ua nuoba era ampeçou para bien de Sendin.
Ls trabalhos de l die acabórun cun la bejita al Centro de Musica “Sons da Terra”.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
