Muitas bezes la giente se pregunta quando tenerie sido feita esta strada, aqueilha capielha, aqueilha cruç… i quedamos-mos a pensar i la mais de las bezes naide se lhembra, pus agora que hai la possiblidade de deixar todo registrado, eiqui benimos nós a deixar mais este registro. L IC5 antrou onte ne l termo de Sendin.
Peinhas Falcon que bírun passar l carril mourisco, la linha de camino de fierro, la strada nacional 221, béien agora passar l IC5 que agarra mais campo que las outras três. I por adonde tenerán acesso las tierras para alhá de l IC5. Talbeç haba que fazer outro camino i mais campo será acupado.
Todo esto deberie fazer-mos pensar an cumo todo ye passageiro. Mas l porgesso a esso oubriga, a demudar todo cul tiempo. L tiempo que nun ye mais que la bida de l mundo que nun para i que mos bai lhebando cun eilha. Por esso ye amportante mantener la mimória para ls que mos sustituíren sában las sues ouriges.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
