Mais ua grande einiciatiba de la Cámara de Miranda de l Douro, ne l sitio de la Casa de la Música – “Sons da Terra”, an Sendin i que ajuntou alguas de las percipales figuras de la politica, de la música i de la cultura mirandesa.
Bino esta tertúlia ne l seguimento doutra subre la lhéngua i a que outras se seguirán, cumo la prócima, que será die 4 de Junio, na Fraúga an Picuote i que será subre la lhiteratura oural mirandesa. A estas tertúlias poderán ir para alhá de ls que yá son partecipantes habituales, todos ls que quejíren lhebar algo de buono para l tema ou que quérgan oubir i daprender.
Nesta houbo buonas anterbençones i eideias para que la Câmara puoda tomar decisones subre la cultura i la musica ne l Praino. Ye la Câmara que debe decidir yá que bai a pagar i fui quien ls mirandeses scuolhírun para defender ls antresses de l Praino i nó ls antresses de quien quier ganhar denheiro ou promober projetos pessonales.
Por nós, demos la nuossa oupenion i gustariemos que la cámara penssasse tenendo an cuonta l que ye de antresse de l Praino porque fui para esso que fui scolhida. L Praino ye ua mina de cultura i cumo las minas de ouro, nun podemos deixar que splóren la mina até nun tener mais antresse i nun acunteça que ls garimpeiros que por ende ban aparecendo, mos lhíeben l’ouro i mos déixen cul cascalho i las ruínas de la mina.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
