Mais un anho i mais un die de reunion de las familhias i de l rebibir de las tradiçones. Ye siempre buono quando ls sendineses i todos ls que gústan de las sues tierras i familhias, búolben als sítios adonde nacírun ou adonde ténen las familhias para cumbibíren. La Páscoa ye siempre un de ls dies mais amportantes para esso, tanto porque ye tiempo de recunciliaçon cumo porque ye tiempo de Primabera.
L folar faç parte yá de l quemer de todos i podemos dezir, inda que haba muita anjustícia, que hai mais giente a quemer l folar i a comemorar la Páscoa. Sendin ganha outra bida cun la benida de ls sous filhos pródigos (que ándan pul mundo) i que nestes dies son recebidos cun mais carino.
La tourada yá passou a tirar la dreita al jogo casados i solteiros i ye siempre ua fiesta ne l campo de la bola i que trai muita giente de ls pobos alredror de Sendin. L HOIJE deseia a todos uas Buonas Páscoas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
