MEDITAÇON:
- Dixe-les Pilatos : " Qu'hei-de fazer anton de Jasus chamado Cristo? ".
- Eilhes respundírun : " Seia curceficado !".
- I el acrecentou : " Mas que mal fizo El? ".
- Eilhes anton gritórun mais fuorte : " Seia curceficado! ".
Anton soltou-les Barrabás i, depuis de tener feito flagelar Jasus, antregou-Lo als suldados para que fusse curceficado ( Mt 27,22-23.26 )
Rializou-se ne l die 2 de Abril an Miranda de l Douro la repersentaçon al aire libre de la “Via Sacra”. Esta ye ua eniciatiba de la Associaçon Mirandanças an colaboraçon cul Munecípio mirandés. ye un porjeto qu'ambolbiu parte de la populaçon mirandesa que participou atibamente nesta repersentaçon adonde stubírun ambuolbidos cerca de 40 eilemientos que amostrórun l Camino Sagrado (Via Sacra). De referir, que la Praça D. João III fui l local scuolhido pa la rializaçon deste eibento adonde stubo muita giente de Miranda i alredrores.
L PCP quier que las ouperadoras de redes mobles assegúren l'acesso als serbícios de quemunicaçones mobles i anterneta na region. Mas este ye un deseio de todos ls que nun cunsíguen que an muitos sítios de l cunceilho, la anterneta moble i ls telemobles funciónen bien, criando muitos porblemas a todo mundo.
Son estes porblemas que dében lhebar ls políticos i ls que pénsan que todo mándan, por ls amigos que ténen an Lisboua ou na politica, a ousar ls sous coincimientos i anfluéncias i nó para tratar de la bida deilhes i de ls amigos, cun l denheiro de todos nós. Meditaçon ye pensar an sermos melhores, oubir ls outros, mas tamien nun calhar. Cristo morriu para sermos lhuç i nó bibirmos na scuridon. Morriu para nun tenermos miedo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
