III Copa Eiberica de Cetrarie
L Praino ye un de ls melhores sítios para ls çportos li(g)ados a la caça. Sabemos que muita giente ye acontra la caça, mas hai muita cousa que se puode fazer para que la atibidade se baia houmanizando cada beç mais i que l anstinto de caçador que ténen la maiorie de ls animales seia outelizado de un modo mais racional. L bideo amostra ua atibidade que se puode praticar ne l Praino i que puode zambuolber l turismo.
La cetrarie ye la arte de caçar cun abes de presa i ls falcones i las águilas son outelizados para esta atibidade, mais eicológica i mais natural. L’ambiente nun ye poluído puls chombos i mesmos las spécies a ser caçadas, ténen un modo mais natural de se defendéren i até de daprendéren a subrebibir melhor. Tamien ye un modo de preserbar spécies an bias de çtinçon, porque púoden ser ansinadas a caçar i a podéren ser lhibertadas cun mais facelidade.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
