L Die de la Tierra fui criado an 1970, pul Senador norte-amaricano Gaylord Nelson, que ourganizou l purmeiro protesto nacional contra la poluiçon, protesto esse cordenado a nible nacional por Denis Hayes. Esse die cunduziu a la criaçon de la Agéncia de Proteçon Ambiental de ls Stados Ounidos (EPA).
A partir de 1990, l die 22 de Abril fui aperfilhado mundialmente cumo l Die de la Tierra , dando ua grande upa als sfuorços de reciclaige a nible mundial i ajudando a preparar l camino pa la Cimeira de l Riu (1992). Atualmente, ua ourganizaçon anternacional, la “Rede Die de la Tierra ” cordena eibentos i atebidades a nible mundial que celébran este die.
Mas que fui que fizo aparecer esse protesto? Nada mais que l modo pouco racional cumo ls homes gástan einergie i inda mais l modo cumo la cunsíguen. Parece que l home nun ye deste planeta i que para bibir ten que recorrer a meios que nun ténen nada a ber cun la natureza, mas ten que pensar que la preserbaçon de l ambiente ye preserbar l sou feturo.
Ye pena que ls pertueses pouco se ampórten cun este die i que solo alguas scuolas l sáben comemorar.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
