La APEGA cuntina a ser ua de las associaçones mais amportantes de l Praino, tanto pul sou trabalho de l die a die na defesa de la raça de ls burros mirandeses, cumo pul sou trabalho de animaçon i de formaçon que trai durante todo l anho melhares de turistas i de studantes de muitos paízes a las tierras de Miranda.
Fazer ua fiesta ua beç ne l anho, todo mundo faç i todas las tierras l fázen i anton se fur la câmara a pagar ls gastos inda mais fácel ye. L mais amportante ye criar cundiçones para que durante todo l anho haba giente a benir para que l nuosso Praino nun quede deserto i tamien para que ls que eiqui stan quérgan cuntinar.
Hoije la APEGA fizo mais ua açon de formaçon para beterinairos i de animaçon para ls que neste fin de semana quejírun benir al Praino i la própia TVI aporbeitou estas açones para fazer ua reportage. Ye assi que se amostra l Praino i que porqui inda hai quien faga cousas. Hai giente de algues aldés i alguns que stan fuora, que solo conhécen la praça de la sue aldé ou la sala de la sue telbison, mas hai muito mundo para alhá desso.
L HOIJE faç por star an todo lado para bos ir dando las amboras i quedardes mais i melhor anformados, mas se, cumo alguns, tubissemos las ajudas queilhes ténen muito mais se poderie fazer.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
