Lembráncias de garotico fazírun-mos ir a la “LHUÇ” , si porque quando eramos pequeinho stabamos siempre a la spera de ls arrebuçados que mos traíen de la luç . Nun era porque tubissemos ganas de arrebuçados, porque tamien ls bendiemos ne l soto, mas porque éran defrentes, uns cumo martielhos, outros cumo ruodras na punta dun palo i outros cumo caiatas.
Fumos i nun cumpremos ls arrebuçados, yá nun somos lambiatos cumo de ninos inda que la giente de bielha se faga glosa. Mas nun deixemos de ber la feira toda i de fazer alguns bideos para quedáren cumo decumiento. Yá tenemos muita grabaçon, mas todos ls anhos hai algo defrente, ye por esso que la Luç ye ua de las maiores romaries i feiras de l Praino i até de l Norte de Pertual.
Tamien acumpanhemos la procisson i fui anteressante ber l modo de cumo acaba, mas yá bos amostraremos todo, bonda benirdes eiqui para berdes la procisson i la çcarga de foguetes quando Nuossa Senhora entra na capielha. Melhares de pessonas bénen tols anhos a la Luç i ti Ginja de Malhadas inda dá la puosta, cumo l fizo to la bida.
Ls spanholes son tamien muitos i alhi ne l cabeço de la Luç , cumpriu-se Abril i la UE ye ua realidade. Por muito que alguns quérgan mirar para trás ou que téngan miedo de ir até al feturo, la realidade ye que l mundo camina sien sperar por naide i l sou caminar ye firme i seguro. Nós ye que nun passamos de folharascas que ua bufada de biento lhieba sien mos darmos cunta.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
