LIBRO DE l DOUTOR RODRIGUES MOURINHO
L sendinés António Rodrigues Mourinho, un de ls poucos doutorados de la nuossa tierra, publicou l libro subre la “Arquitectura Religiosa na Antiga Diocese Miranda do Douro – Bragança”. Ye un trabalho de ambestigaçon subre la arquitetura religiosa i que trai muita cousa einédita, que ben anriquecer la stória de la nuossa region. La apresentaçon de l libro fui ne l Arquibo Çtrital de Bregáncia adonde stubírun muitas caras coincidas de la cultura Trasmontana.
António Rodrigues Mourinho falou, cumo podeis ber ne l bideo subre un tema que tem dado muita çcusson, que ye l de la nuossa diocese se chamar Bragança – Miranda, titalo que el aceita, mas siempre bai dezindo que l nome deberie ser Miranda do Douro – Bragança porque ye este l nome que storicamente mais cunsistencia ten. La diocese fui criada an Miranda i solo mais tarde la sede passou para Bregáncia. Tamien faç ua chamada als mais nuobos, para se dedicáren a la ambestigaçon, porque muito hai inda por fazer.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
