Ne l die antes de la fiesta de San Sebastian, que cumo ye uso an Sendin ye feita puls bumbeiros porque ye l sou patrono, faç-se ua ida als semitérios adonde stan anterradas pessonas que fúrun amportantes na bida de la associaçon para le poner un ramo de froles i le rezar ua ouracion cumo recoincimento i para que la sue lembráncia nun se apague.
Fui purmeiro al semitério de sendin i apuis al de Picuote. Son estes géstios que amóstran cumo ye l sprito de ls bumbeiros, tanto cun respeito als bibos cumo als muortos. Manhana y ela fiesta de San Sebastian mas hoije houbo que lembrar ls que yá nun púoden star a eilha. Mas la bida ye assi i lhougo a la nuite será l arraial i alhá staremos para bibir culs bibos anquanto Dius quejir.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
