Sendin acordou onte al son de ls foguetes, era die de fiesta, fiesta de San Sebastian que cumo acuntece tols anhos ye feita puls bumbeiros. Nun houbo banda de música, mas tubimos las fanfarras de Sendin i de ls bumbeiros de Sanfins de l Douro. Fúrun las dues fanfarras que andórun pulas rues para l peditório para la fiesta.
La fanfarra de Sendin
La fanfarra de Sanfins de l Douro
Fui anteressante ber ls moços i moças de las dues fanfarras a tocar i animar la nuossa bila. Quando alguien diç que ls moços i moças nun partecípan i guárdan l gusto pula musica i la arte, que ténen pouco amor a las sues tierras i pouco partecípan nas associaçones, bien se anganha. Manhan bos amostraremos l bideo de ua fanfarra i apuis de la outra. Dá gusto ber la mocidade a marchar i a tocar.
Oferta de un quadro de San Sebastian cun ua ouraçion en sendinês
Fanfarra a acabar l peditório
Apuis de l peditório, las fanfarras almuorçórun juntas ne l quartel i a las 14h30 houbo la procisson de la eigreija a la capielha de San Sebastian a que se seguiu la missa. Na procisson bai Nuossa Senhora tamien, que ne l fin de la missa buolbe na procisson para la eigreija.
La procisson
La missa
Pouca giente se dá de cuonta, mas antes de Nuossa Senhora buolber ye cantada la çpedida a la puorta de la capielha, nun cântico cheno de segneficado. Tamien fazimos un bideo de la procisson que amostraremos tamien durante la semana, para ls que bíben loinje béren la maiorie de ls sendineses, que inda stan por acá.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
