Realizou-se onte an Miranda l cumbibio anual de ls ex-cumbatentes de l’ultramar que bíben ou nacírun ne l cunceilho i este anho fui stensibo a las mulhieres porque tamien eilhas sufrírun las agruras de la guerra, guerra que naide quijo, mas an que muitos partecipórun.
Este anho la câmara quijo associar-se i para alhá de haber recebido a todos ne l salon nobre, puso l nome de “Abenida de ls Antigos Cumbatentes de l Ultramar” a ua abenida nuoba junto a las muralhas, ne l Barrio Berde. Fui ua cerimónia chena de segneficado, tenendo inda sido prestada houmenage als ex-cumbatestes muortos, ponendo ua crona de froles junto a la placa.
L’almuorço fui na pousada i a todos fui ouferecida ua faca de Palaçuolo, ua garrafa de bino de la Coopratiba de Sendin i l pin de la cidade, outerecidos pula câmara munecipal. Fui ua fiesta agradáble i serbiu para ls ex-cumbatentes de las aldés se ancuntráren i de recebíren ls que benírun de muito lado i que deste modo tubírun l’ouportunidade de tornar al Praino apuis de muitos anhos.
Para l’anho que ben tornará a fazer-se l cumbibio, stando yá feita la pormessa por l presidente de la câmara de einougurar ua placa culs nomes de todos ls ex-cumbatentes muortos. Que todos ls que nun benírun este anho l fágan pal anho.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
